|| వసంత వేకువ ||

 || వసంత వేకువ ||

||కొయ్యబారిన కొమ్మల్లో రాలిపోయిన రెమ్మల్లో
ఆకులే అలములై పోతుంటే
సూరీడు మరింత సూటిగా చూస్తుంటే
చిన్న బోయిన చెట్లన్నీచేతలుడిగి పోతుంటే
శిశిరం చిద్విలాసం చిందులు వేస్తుంటే
వసంత వేకువ వెల్లువలా వచ్చి వాలింది.

కోకిలమ్మ కొలువై ప్రకృతిలో నెలవై
కొమ్మ కొమ్మను కదిలించి
రెమ్మ రెమ్మను రెట్టించి బాణీలు ఎన్నో సృష్టించి
సాగే సంగీతం సెలయేరులు తాకి
చిరుగాలిని కలసి పుష్పాలను పలకిరించి
పుప్పొడిని పరికించి
తుమ్మెద నాదంతో జుమ్మని జతకట్టి
ఏటిలోని ఎంకి యెదను తాకింది

తొలికిరణం తాకిన చిగురుటాకు సిగ్గులు
గట్టు మీద గెంతులు గువ్వల గుంపులు
ఎదురులేని ఏరులు ఏరువాక శూరులు
మావిపిందె పూతలు ముసురుకున్న మబ్బులు
ఉదయించిన ఉషస్సులే ఉగాదికి తపస్సులు
ఇది ప్రకృతికే పరవశం జీవకోటి సుకృతం||